मुगु, १६ साउन । मुगुको सदरमुकाम गमगढीदेखि मुगु गाउँतर्फ जाँदै गरेका एक जना ठेकेदार बेपता भएका छन् । जिल्लाको पुर्वी करान भेगमा पर्ने मुगुम कार्मारोङ गाउँपालिका–२ मुगु गाउँका अन्दाजी ३० वर्षीया ठेकेदार टासी तामाङ २० लाख रुपैयाँसहित गत १४ गते देखि बेपत्ता हुन् ।
बैंकबाट २० लाख रकम झिकेर मुगु गाउँतिर जाँदै गरेका ठेकेदार टाँसी चार दिनदेखि बेपत्ता भएको प्रहरी नायव उपरीक्षक भुवनेश्वरप्रसाद साहले बताए ।
पुलु प्रहरी चौकीले खोजीकार्य जारी राखे पनि अहिलेसम्म उनीलाई फेला पार्न नसकेको उनले जनाए ।
१३ साउन राति चितै कुनामा रहेको होटेलमा टाँसी वास बसेको र सोही राति झगडा भएको भन्ने सुनिएको हुँदा झगडामा चोट लागेका एक व्यक्तिलाई समेत पक्राउ गरी जिल्ला प्रहरी कार्यालय ल्याइएको उनको भनाइ छ ।
कोइकी पर्यटकीय पथमार्ग निर्माण कार्यको ठेक्का टाँसीका दाजु उर्गिन तामाङले लिएको र आयोजना स्थलमा प्रतिनिधिको रूपमा उनले कामकाज गराउँदै आएको अवस्थामा कामदारहरूको रकम भुक्तानीका लागि पुलु बैंकमा रकम झिकेर फर्किने वेला बेपत्ता भएका हुन् ।
मुगुम कार्मारोङ गाउँपालिकाको केन्द्र रहेको पुलुदेखि मुगु गाउँसम्म पुग्न करिब एक दिन लाग्ने र उक्त बाटो मुगु कर्णाली नदीको किनारैकिनार भएको हुँदा नगद लुट्ने लोभले केही घटना घटेको हुन सक्ने अनुमान प्रहरीले गरेको छ ।
ठूलो वर्षातका कारण र अर्कोतिर मुगु कर्णाली नदीको बहाव पनि अत्यधिक बढेको हुँदा खोजीकार्यका लागि मुस्किल भएको प्रहरीले जनाएको छ ।