कालीकोट- साउन ३२- शुभकालिका गाउँपालिका–४ मुग्राहाका २५ वर्षीय पङ्खबहादुर बिकलाई सोही ठाउँका २३ वर्षीय अर्जुन शाही, २२ वर्षीय कमल शाही, १९ वर्षीय युवराज शाहीलगायतको समूहले कुटपिट गरेको पीडित पक्षको आरोप छ ।
शुभकालिका गाँउपालिका–७ स्थित मच्छेवाडीमा रहेको धबलपूरा देवताको पूजा गर्न मन्दिरभित्र प्रवेश गर्न खोज्दा साउन २६ गते पीडितलाई आरोपितहरूले कुटपिट गरिएको पीडितले इन्सेक प्रतिनिधिलाई बताउनुभयो ।
पीडितका अनुसार दलित भएकाले मन्दिरमा जान नपाइने भन्दै बाटो छेकी आरोपितहरूले आफूलाई ढुङ्गा र दाउराले कुटपिट गरी भीरबाट खसालिदिएका थिए ।
बुटपिटका कारण पीडितको दायाँ गोडा र घाँटीमा गम्भीर चोट लागेका कारण उपचार भइरहेको जिल्ला अस्पताल कालिकोटका सूचना अधिकारी कटक महतले इन्सेक प्रतिनिधिलाई बताउनुभयो ।
जातीय छुवाछूत गरी कुटपिट गरेको आरोपमा आरोपितहरूविरूद्ध पीडितले जिल्ला प्रहरी कार्यालय कालिकोटमा साउन २९ गते उजुरी दर्ता गराउनुभएको छ ।
जिल्ला प्रहरी कार्यालयका डिएसपी श्याम ओलियाले जातीय विभेदको उजुरी दर्ता भएको र घटनामा संलग्न व्यक्ति फरार रहेकाले खोजी कार्य जारी रहेको जानकारी दिनुभयो ।
