नीस्ता कार्की/कालिकोट । जिल्लाको तिलागुफा नगरपालिका – ४ राँचुली गाउँ स्थित दलित बस्तीमा आज बिहान आगलागी भएर ४ घर नष्ट हुँदा १३ घरपरिवार घरबिहीन बनेका छन् ।
काठका छाना भएका घरहरुमा आज शनिबार बिहानै एक घरदेखि सल्केको आगो अन्य घरहरुमा सरेर ४ घर नष्ट बनेको जिल्ला प्रहरी कार्यालयले जनाएको छ ।
आगलागीबाट भएको क्षतिको एकिन विवरण आउन बाँकी नै रहेको छ भने नगरपालिकाले खरका छाना मुक्त पालिका बनाउनका लागि घोषणा गरेकोमा कार्यान्वयन हुन सकिरहेको छैन ।
अत्यन्तै नाजुक आर्थिक अवस्थाका दलित बस्तीमा आगलागी भएपछि पीडितलाई तत्कालै उचित राहतको व्यवस्थापन गर्न नेकपा तिलागुफा नगर कमिटी अध्यक्ष दिनेश चँदाराले सम्बन्धित निकायको ध्यानाकर्षण गराउनु भएको छ । स्थानीयहरुको सक्रियतामा यतिबेला आगलागी नियन्त्रणमा आएको र घटना स्थलमा प्रहरी टोली पुगेर क्षतिको बिस्तृत विवरण तयार भैरहेको बताइएको छ ।
